Baruch 5

¹Exue te, Ierusalem, stola luctus et vexationis tuae, et indue te decore, et honore eius, quae a Deo tibi est, sempiternae gloriae.

²Circumdabit te Deus diploide iustitiae, et imponet mitram capiti honoris aeterni.

³Deus enim ostendet splendorem suum in te, omni qui sub caelo est.

⁴Nominabitur enim tibi nomen tuum a Deo in sempiternum: pax iustitiae, et honor pietatis.

⁵Exsurge, Ierusalem, et sta in excelso: et circumspice ad orientem, et vide collectos filios tuos ab oriente sole usque ad occidentem, in verbo Sancti, gaudentes Dei memoria.

⁶Exierunt enim abs te pedibus ducti ab inimicis: adducet autem illos Dominus ad te portatos in honore sicut filios regni:

⁷constituit enim Deus humiliare omnem montem excelsum et rupes perennes, et convalles replere in aequalitatem terrae, ut ambulet Israël diligenter in honorem Dei.

⁸Obumbraverunt autem et silvae, et omne lignum suavitatis Israël ex mandato Dei.

⁹Adducet enim Deus Israël cum iucunditate in lumine maiestatis suae, cum misericordia et iustitia quae est ex ipso.