Baruch 1

¹Et haec verba libri quae scripsit Baruch filius Neriae, filii Maasiae, filii Sedeciae, filii Sedei, filii Helciae, in Babylonia, ²in anno quinto, in septimo die mensis, in tempore quo ceperunt Chaldaei Ierusalem, et succenderunt eam igni. ³Et legit Baruch verba libri huius ad aures Iechoniae filii Ioakim regis Iuda, et ad aures universi populi venientis ad librum, ⁴et ad aures potentium, filiorum regum, et ad aures presbyterorum, et ad aures populi, a minimo usque ad maximum eorum, omnium habitantium in Babylonia, ad flumen Sodi. ⁵Qui audientes plorabant, et ieiunabant, et orabant in conspectu Domini. ⁶Et collegerunt pecuniam, secundum quod potuit uniuscuiusque manus, ⁷et miserunt in Ierusalem ad Ioakim filium Helciae filii Salom sacerdotem, et ad sacerdotes, et ad omnem populum qui inventi sunt cum eo in Ierusalem: ⁸cum acciperet vasa templi Domini, quae ablata fuerant de templo, revocare in terram Iuda, decima die mensis Sivan, vasa argentea quae fecit Sedecias filius Iosiae rex Iuda, ⁹posteaquam cepisset Nabuchodonosor rex Babylonis Iechoniam, et principes, et cunctos potentes, et populum terrae, ab Ierusalem, et duxit eos vinctos in Babylonem. ¹⁰Et dixerunt: Ecce misimus ad vos pecunias, de quibus emite holocautomata et thus: et facite manna, et offerte pro peccato, ad aram Domini Dei nostri: ¹¹et orate pro vita Nabuchodonosor regis Babylonis, et pro vita Baltassar filii eius, ut sint dies eorum sicut dies caeli super terram: ¹²et ut det Dominus virtutem nobis, et illuminet oculos nostros, ut vivamus sub umbra Nabuchodonosor regis Babylonis, et sub umbra Baltassar filii eius, et serviamus eis multis diebus, et inveniamus gratiam in conspectu eorum. ¹³Et pro nobis ipsis orate ad Dominum Deum nostrum, quia peccavimus Domino Deo nostro, et non est aversus furor eius a nobis usque in hunc diem. ¹⁴Et legite librum istum quem misimus ad vos recitari in templo Domini, in die solemni et in die opportuno:

¹⁵et dicetis: Domino Deo nostro iustitia, nobis autem confusio faciei nostrae, sicut est dies haec omni Iuda, et habitantibus in Ierusalem:

¹⁶regibus nostris, et principibus nostris, et sacerdotibus nostris, et prophetis nostris, et patribus nostris.

¹⁷Peccavimus ante Dominum Deum nostrum, et non credidimus, diffidentes in eum:

¹⁸et non fuimus subiectibiles illi, et non audivimus vocem Domini Dei nostri, ut ambularemus in mandatis eius, quae dedit nobis.

¹⁹A die qua eduxit patres nostros de terra Aegypti, usque ad diem hanc, eramus incredibiles ad Dominum Deum nostrum: et dissipati recessimus, ne audiremus vocem ipsius:

²⁰et adhaeserunt nobis multa mala et maledictiones quae constituit Dominus Moysi servo suo, qui eduxit patres nostros de terra Aegypti, dare nobis terram fluentem lac et mel, sicut hodierna die.

²¹Et non audivimus vocem Domini Dei nostri, secundum omnia verba prophetarum quos misit ad nos:

²²et abivimus unusquisque in sensum cordis nostri maligni, operari diis alienis, facientes mala ante oculos Domini Dei nostri.