Iosue 19

¹Et egressa est sors secunda filiorum Simeon per cognationes suas: fuitque haereditas ²eorum in medio possessionis filiorum Iuda: Bersabee et Sabee et Molada ³et Hasersual, Bala et Asem ⁴et Eltholad, Bethul et Harma ⁵et Siceleg et Bethmarchaboth et Hasersusa ⁶et Bethlebaoth et Sarohen: civitates tredecim, et villae earum. ⁷Ain et Remmon et Athar et Asan: civitates quatuor, et villae earum: ⁸omnes viculi per circuitum urbium istarum usque ad Baalath Beer Ramath contra australem plagam. Haec est haereditas filiorum Simeon iuxta cognationes suas, ⁹in possessione et funiculo filiorum Iuda: quia maior erat, et idcirco filii Simeon possederunt in medio haereditatis eorum.

¹⁰Ceciditque sors tertia filiorum Zabulon per cognationes suas: factus est terminus possessionis eorum usque Sarid. ¹¹Ascenditque de mari et Merala, et pervenit in Debbaseth, usque ad torrentem qui est contra Ieconam. ¹²Et revertitur de Sared contra orientem in fines Ceseleththabor: et egreditur ad Dabereth, ascenditque contra Iaphie. ¹³Et inde pertransit usque ad orientalem plagam Gethepher et Thacasin: et egreditur in Remmon, Amthar et Noa. ¹⁴Et circuit ad aquilonem Hanathon: suntque egressus eius vallis Iephthaël, ¹⁵et Cateth et Naalol et Semeron et Ierala et Bethlehem: civitates duodecim, et villae earum. ¹⁶Haec est haereditas tribus filiorum Zabulon per cognationes suas, urbes et viculi earum.

¹⁷Issachar egressa est sors quarta per cognationes suas: ¹⁸fuitque eius haereditas Iezraël et Casaloth et Sunem ¹⁹et Hapharaim et Seon, et Anaharath ²⁰et Rabboth et Cesion, Abes, ²¹et Rameth, et Engannim, et Enhadda et Bethpheses. ²²Et pervenit terminus eius usque Thabor et Sehesima et Bethsames, eruntque exitus eius Iordanis: civitates sedecim, et villae earum. ²³Haec est possessio filiorum Issachar per cognationes suas, urbes et viculi earum.

²⁴Ceciditque sors quinta tribui filiorum Aser per cognationes suas: ²⁵fuitque terminus eorum Halcath et Chali et Beten et Axaph ²⁶et Elmelech et Amaad et Messal: et pervenit usque ad Carmelum maris et Sihor et Labanath, ²⁷ac revertitur contra orientem Bethdagon: et pertransit usque Zabulon et vallem Iephthaël contra aquilonem in Bethemec et Nehiel. Egrediturque ad laevam Cabul, ²⁸et Abran et Rohob et Hamon et Cana, usque ad Sidonem magnam. ²⁹Revertiturque in Horma usque ad civitatem munitissimam Tyrum, et usque Hosa: eruntque exitus eius in mare de funiculo Achziba: ³⁰et Amma et Aphec et Rohob: civitates viginti duae, et villae earum. ³¹Haec est possessio filiorum Aser per cognationes suas, urbesque et viculi earum.

³²Filiorum Nephthali sexta sors cecidit per familias suas: ³³et coepit terminus de Heleph et Elon in Saananim, et Adami, quae est Neceb, et Iebnaël usque Lecum: et egressus eorum usque ad Iordanem: ³⁴revertiturque terminus contra occidentem in Azanotthabor, atque inde egreditur in Hucuca, et pertransit in Zabulon contra meridiem, et in Aser contra occidentem, et in Iuda ad Iordanem contra ortum solis: ³⁵civitates munitissimae, Assedim, Ser, et Emath, et Reccath et Cenereth, ³⁶et Edema et Arama, Asor ³⁷et Cedes et Edrai, Enhasor, ³⁸et Ieron et Magdalel, Horem et Bethanath et Bethsames: civitates decem et novem, et villae earum. ³⁹Haec est possessio tribus filiorum Nephthali per cognationes suas, urbes et viculi earum.

⁴⁰Tribui filiorum Dan per familias suas egressa est sors septima: ⁴¹et fuit terminus possessionis eius Sara et Esthaol, et Hirsemes, id est, civitas solis. ⁴²Selebin et Aialon et Iethela, ⁴³Elon et Themna et Acron, ⁴⁴Elthece, Gebbethon et Balaath, ⁴⁵et Iud et Bane et Barach et Gethremmon: ⁴⁶et Meiarcon et Arecon, cum termino qui respicit Ioppen, ⁴⁷et ipso fine concluditur. Ascenderuntque filii Dan, et pugnaverunt contra Lesem, ceperuntque eam: et percusserunt eam in ore gladii, et possederunt, et habitaverunt in ea, vocantes nomen eius Lesem Dan, ex nomine Dan patris sui. ⁴⁸Haec est possessio tribus filiorum Dan, per cognationes suas, urbes et viculi earum.

⁴⁹Cumque complesset sorte dividere terram singulis per tribus suas, dederunt filii Israël possessionem Iosue filio Nun in medio sui, ⁵⁰iuxta praeceptum Domini, urbem quam postulavit Thamnath Saraa in monte Ephraim: et aedificavit civitatem, habitavitque in ea.

⁵¹Hae sunt possessiones, quas sorte diviserunt Eleazar sacerdos, et Iosue filius Nun, et principes familiarum ac tribuum filiorum Israël in Silo, coram Domino ad ostium tabernaculi testimonii: partitique sunt terram.