Deuteronomium 34

¹Ascendit ergo Moyses de campestribus Moab super montem Nebo, in verticem Phasga contra Iericho: ostenditque ei Dominus omnem terram Galaad usque Dan, ²et universum Nephthali, terramque Ephraim et Manasse, et omnem terram Iuda usque ad mare novissimum, ³et australem partem, et latitudinem campi Iericho civitatis palmarum usque Segor. ⁴Dixitque Dominus ad eum: Haec est terra, pro qua iuravi Abraham, Isaac, et Iacob, dicens: Semini tuo dabo eam. Vidisti eam oculis tuis, et non transibis ad illam.

⁵Mortuusque est ibi Moyses servus Domini, in terra Moab, iubente Domino: ⁶et sepelivit eum in valle terrae Moab contra Phogor: et non cognovit homo sepulchrum eius usque in praesentem diem. ⁷Moyses centum et viginti annorum erat quando mortuus est: non caligavit oculus eius, nec dentes illius moti sunt. ⁸Fleveruntque eum filii Israël in campestribus Moab triginta diebus: et completi sunt dies planctus lugentium Moysen.

⁹Iosue vero filius Nun repletus est spiritu sapientiae, quia Moyses posuit super eum manus suas. Et obedierunt ei filii Israël, feceruntque sicut praecepit Dominus Moysi.

¹⁰Et non surrexit ultra propheta in Israël sicut Moyses, quem nosset Dominus facie ad faciem, ¹¹in omnibus signis atque portentis, quae misit per eum, ut faceret in terra Aegypti Pharaoni, et omnibus servis eius, universaeque terrae illius, ¹²et cunctam manum robustam, magnaque mirabilia, quae fecit Moyses coram universo Israël.