Ad Romanos 4

¹Quid ergo dicemus invenisse Abraham patrem nostrum secundum carnem? ²Si enim Abraham ex operibus iustificatus est, habet gloriam, sed non apud Deum. ³Quid enim dicit Scriptura? Credidit Abraham Deo, et reputatam est illi ad iustitiam. ⁴Ei autem qui operatur, merces non imputatur secundum gratiam, sed secundum debitum. ⁵Ei vero qui non operatur, credenti autem in eum, qui iustificat impium, reputatur fides eius ad iustitiam secundum propositum gratiae Dei. ⁶Sicut et David dicit beatitudinem hominis, cui Deus accepto fert iustitiam sine operibus: ⁷Beati, quorum remissae sunt iniquitates, et quorum tecta sunt peccata. ⁸Beatus vir, cui non imputavit Dominus peccatum.

⁹Beatitudo ergo haec in circumcisione tantum manet, an etiam in praeputio? Dicimus enim quia reputata est Abrahae fides ad iustitiam. ¹⁰Quomodo ergo reputata est? in circumcisione, an in praeputio? Non in circumcisione, sed in praeputio. ¹¹Et signum accepit circumcisionis, signaculum iustitiae fidei, quae est in praeputio: ut sit pater omnium credentium per praeputium, ut reputetur et illis ad iustitiam: ¹²et sit pater circumcisionis non iis tantum, qui sunt ex circumcisione, sed et iis qui sectantur vestigia fidei, quae est in praeputio patris nostri Abrahae.

¹³Non enim per legem promissio Abrahae, aut semini eius ut haeres esset mundi: sed per iustitiam fidei. ¹⁴Si enim qui ex lege, haeredes sunt: exinanita est fides, abolita est promissio. ¹⁵Lex enim iram operatur. Ubi enim non est lex, nec praevaricatio. ¹⁶Ideo ex fide, ut secundum gratiam firma sit promissio omni semini, non ei qui ex lege est solum, sed et ei qui ex fide est Abrahae, qui pater est omnium nostrum ¹⁷(sicut scriptum est: Quia patrem multarum gentium posui te) ante Deum, cui credidit, qui vivificat mortuos, et vocat ea quae non sunt, tamquam ea quae sunt: ¹⁸qui contra spem in spem credidit, ut fieret pater multarum gentium secundum quod dictum est ei: Sic erit semen tuum. ¹⁹Et non infirmatus est fide, nec consideravit corpus suum emortuum, cum iam fere centum esset annorum, et emortuam vulvam Sarae. ²⁰In repromissione etiam Dei non haesitavit diffidentia, sed confortatus est fide, dans gloriam Deo: ²¹plenissime sciens, quia quaecumque promisit, potens est et facere. ²²Ideo et reputatum est illi ad iustitiam.

²³Non est autem scriptum tantum propter ipsum quia reputatum est illi ad iustitiam: ²⁴sed et propter nos, quibus reputabitur credentibus in eum, qui suscitavit Iesum Christum Dominum nostrum a mortuis, ²⁵qui traditus est propter delicta nostra, et resurrexit propter iustificationem nostram.