Ad Ephesios 6

¹Filii, obedite parentibus vestris in Domino: hoc enim iustum est. ²Honora patrem tuum, et matrem tuam, quod est mandatum primum in promissione: ³ut bene sit tibi, et sis longaevus super terram. ⁴Et vos patres, nolite ad iracundiam provocare filios vestros: sed educate illos in disciplina et correptione Domini. ⁵Servi, obedite dominis carnalibus cum timore et tremore, in simplicitate cordis vestri, sicut Christo: ⁶non ad oculum servientes, quasi hominibus placentes, sed ut servi Christi, facientes voluntatem Dei ex animo, ⁷cum bona voluntate servientes, sicut Domino, et non hominibus: ⁸scientes quoniam unusquisque quodcumque fecerit bonum, hoc recipiet a Domino, sive servus, sive liber. ⁹Et vos domini, eadem facite illis, remittentes minas: scientes quia et illorum et vester Dominus est in caelis: et personarum acceptio non est apud eum.

¹⁰De cetero, fratres, confortamini in Domino, et in potentia virtutis eius. ¹¹Induite vos armaturam Dei, ut possitis stare adversus insidias diaboli: ¹²quoniam non est nobis colluctatio adversus carnem et sanguinem, sed adversus principes, et potestates, adversus mundi rectores tenebrarum harum, contra spiritualia nequitiae, in caelestibus. ¹³Propterea accipite armaturam Dei, ut possitis resistere in die malo, et in omnibus perfecti stare. ¹⁴State ergo succincti lumbos vestros in veritate, et induti loricam iustitiae, ¹⁵et calceati pedes in praeparatione Evangelii pacis, ¹⁶in omnibus sumentes scutum fidei, in quo possitis omnia tela nequissimi ignea extinguere: ¹⁷et galeam salutis assumite, et gladium spiritus (quod est verbum Dei), ¹⁸per omnem orationem et obsecrationem orantes omni tempore in spiritu: et in ipso vigilantes in omni instantia et obsecratione pro omnibus sanctis: ¹⁹et pro me, ut detur mihi sermo in apertione oris mei cum fiducia, notum facere mysterium Evangelii: ²⁰pro quo legatione fungor in catena, ita ut in ipso audeam, prout oportet me loqui. ²¹Ut autem et vos sciatis quae circa me sunt, quid agam, omnia vobis nota faciet Tychicus, carissimus frater, et fidelis minister in Domino: ²²quem misi ad vos in hoc ipsum, ut cognoscatis quae circa nos sunt, et consoletur corda vestra. ²³Pax fratribus, et caritas cum fide a Deo Patre et Domino Iesu Christo. ²⁴Gratia cum omnibus qui diligunt Dominum nostrum Iesum Christum in incorruptione. Amen.